Yallı: Rəqəmsal Naxış, 2025 

Animasiya, Hərəkət Dizaynı

Xalça toxuma, Tetris oyunu kimi bir şeydir – hər ikisi, hissələri addım-addım düzərək tam bir dizayn yaratmağa əsaslanır. Bu əsərdə Yallı rəqsi, Tetris oyunu kimi rəqəmsal ekranda formalaşır, amma adi Tetris blokları yerinə, Yallı eskizinin elementləri düzgün yerə düşərək tamamlanmış bir şəkil meydana gətirir. Ənənəni müasir texnologiya ilə birləşdirmək, mədəni irsin rəqəmsal olaraq yenidən təcəssüm etdirilə biləcəyini göstərir. Bu həm də Yallı rəqsinin ruhunu əks etdirir – necə ki rəqqaslar bir araya gələrək harmoniya yaradırlar, bu əsərdə də hər bir hissə bütövlüyün bir parçasına çevrilir. Bu əsər qədim və simvolik Yallı rəqsini bərabərlik anlayışının mərkəzinə qoyur.

Yallı təkcə bir rəqs deyil; bu, insanların əl-ələ tutaraq birlikdə hərəkət etdiyi, ritmlə harmoniya yaratdığı bir mədəni irsdir. Bu əsərdə “Yallı” bəşəriyyətin birliyini və sosial, iqtisadi və gender bərabərliyinə töhfə verə biləcək kollektiv gücü əks etdirir.

Rəqsin dairəvi quruluşu fərqliliklərin bərabər şəkildə bölüşdürülməsini və heç kimin digərlərindən üstün olmadığı bir nizamı simvolizə edir. Digər tərəfdən, insanların əl-ələ verməsi insan cəmiyyətinin, müxtəlif mədəniyyətlərin və genderlərin ortaq məqsədlər naminə bir araya gələ biləcəyinə olan inamı ifadə edir. Necə ki, hər bir insan bu rəqsin ahənginə öz töhfəsini verir, eyni şəkildə cəmiyyətlər də ədalət və tarazlığı təmin etmək üçün birgə hərəkət etməlidir.

Bu əsər, fərqliliklərin bir-birinə mane olmadan qovuşduğu, tarazlıq və bərabərliyin təmin olunduğu daha ədalətli və ahəngdar bir dünyanın xəyalî təsviridir. Yallı rəqsinin bu təqdimatı təkcə milli mədəniyyətimizin dəyərini vurğulamır, həm də qlobal problemlərin həlli üçün birlikdə hərəkət etməyin vacibliyini ön plana çıxarır.