Qarğa aramızdan keçir, 2024

Qarışıq media, animasiya

Şəhərə qarğanın gözü ilə baxanda onun müxtəlif vəziyyətlərdən keçdiyinin şahidi oluruq. Şəhər əsasən bozdur, lakin qarğa hərəkət etdikcə şəhər rənglənməyə başlayır. Arzularımızın bizi narahat edən düşüncələrə rəng qatdığı kimi. Metropolis həyatında qarğanın uçuşu arzulara yaxınlaşmağı və öz təbiətinə qayıdışı simvollaşdırır.Rəngsiz şəhər həyatından uzaqlaşaraq, öz arzularına doğru səyahət edən qarğa burada yalnız bir heyvan deyil, həm də insanın xəyalını, ümidini və daxili azadlığını təcəssüm etdirir. Çünki uçan quşlara baxmaq azadlığı hiss etdirir. Onların istədikləri yerlərə uçmaları mümkündürsə, deməli insanın istənilən arzusuna da çatması mümkündür.

Bu qarışıq texnikalı animasiyanın əsas məğzi metropolisdən uçaraq uzaqlaşan qarğa kimi, insanların da onları məhdudlaşdıran düşüncələrdən azad olması və onların əsl təbiəti ilə yenidən əlaqə qurmaq mübarizəsindədir. İstifadə olunan 2D “frame by frame” animasiya və alternativ çap üsulu olan “cyanotype” fotolar retro və analoq bir abu-hava yaradır. İstifadə olunmuş səs effektləri həm metropolisin, həm də daxili dünyamızın səsini əks etdirir.