
Cəmilə Əhmədova
Digər yanım, 2024
Rəqəmsal illustrasiya
21 x 29.7 sm
Bu əsərə baxdıqda nə görürsüz? Çılpaq bir qadın? Hətta bəlkə də “Axı bu incəsənət deyil” deyə düşünürsüz. İncəsənət nədir? İnsan hisslərini təsvir edən vasitə. Yaxşı sənə kiçik bir ipucu verim. “Qurdlarla qaçan qadınlar” kitabını əgər oxumusansa (məncə hələ də gec deyil) bu əsər sənə artıq doğmalaşmağa başlamalı idi. Ordakı çılpaq qadının özünü kəşf etməyə hazırlaşdığını, eyni zamanda cəmiyyətin ona geyindirdiyi “bütün libaslardan” azad olunmuş olduğunu anlayardın. Ordakı soyuqluğun bir qadının cəmiyyət içərisindəki tənhalığını, qurdun isə içimizdəki o yaradıcı və “vəhşi tərəf” olduğunu anlayardın. Çünki sən o kitabı oxusan görərsən ki, əslində bu incəsənətdir və özünü tapmağa davam edən, həmçinin bu cəsarəti göstərən qadınlara həsr olunub. Səssiz, sakit öz küncümüzə çəkilib öz daxili gücümüzü görməyin mahiyyəti və dərinliyi o qədər özəldir ki. Bəlkə az əvvəl gördüyün səhnə dəyişərdi və daşlar yerinə oturardı. Elədirsə bir daha bax! Nə görürsən? Bəlkə də artıq özünü.