Triptix – Şəhəri dolaşan ümidlər, 2016 – 2022

Sulu boya

Silsilə, 30 x 40 sm, 40 x 50 sm, 30 x 40 sm

Əsərlərimin qəhrəmanları uydurma obrazlar deyil; onlar, şəhərimizin küçələrində, bəlkə də, dəfələrlə qarşılaşdığımız real personajlardır.

Rəsmlərdə təsvir olunan qadınlar (şərti olaraq: Nərgiz, Lalə və Zambaq) öz arzu və istəklərinə çatmaq ümidi ilə nə vaxtsa bölgələrdən şəhərə gəliblər.

⁠Lalə hamam kisələri tikir və tikdiyi əlvan kisələri hər gün şəhərin müxtəlif yerlərində qarşısına düzərək satmağa çalışır. Ticarət mərkəzlərində, Mall-larda nəinki bir dükan, heç onların qarşısında əməyinin hasilini düzüb-satmaq xəyalından belə keçmir.

Nərgiz məcburi köçkünçülükdən öncə rayon su melerasiya qovşağında dəftərxanaçı, sonra isə qaynar xətt şöbəsində çalışıb. İndi onu ən çox məşğul edən məsələ süpürgə və digər təmizlik ləvazimatlarının həftəlik vaxtında çatdırılmasını təmin etməkdir.

8-ci km bazarına limonları kəndçisi özü yetişdirib gətirir. Zambaq xanım onları birinci əldən aldığı üçün limonların hesabına mərkəzi küçələrin butün dalan və keçidlərini yerli sakinlərdən daha yaxşı tanıyır. O, tez-tez oxuduğu texnikumu yarımçıq qoyduğuna peşman olur.